Um daginn varð Fífuborgin 26 ára og af því tilefni fékk leikskólinn lag frá Ellu endurvinnsludúkku í afmælisgjöf. Lagið á að hjálpa okkur að muna eftir umhverfismálunum í öllu okkar starfi og er eins konar umhverfissáttmáli leikskólans.
Ellulagið
(Lag: Grænt, grænt, grænt er grasið út í haga)
(texti: Elsa Rún)
Velkomin Ella, á deildina okkar,
viltu kenna okkur að flokka,
:: minnka mengun, plastnotkun og sóun
og styrkja þjóð að sjálfbærri þróun.::
Í janúar ætlar Ella endurvinnsludúkka að fræða okkur um loftslagsbreytingar og gróðurhúsaáhrif.
Hún mun segja okkur frá því hvaða breytingar verða í náttúrunni, í veðurfari, á gróðri og hjá dýrunum. Hún mun ræða hvað getur breyst á Íslandi og hvort það hafi eitthvað breyst nú þegar.
Síðast en ekki síst ætlar Ella að ræða við okkur um hvað hægt sé að gera til að koma sem best fram við jörðina.
 |
Í febrúar ætlar Ella að fræða okkur um um endurvinnslu.
Endurvinnsla er góð leið til að nýta gamalt efni og gera eitthvað nýtt úr því. Með endurvinnslu er líka barist gegn hlýnun jarðar.
Það er hægt að endurvinna ótrúlega marga hluti. Til dæmis pappír, ýmis konar plast, krukkur, pappírsrúllur og margt fleira.
 |
| Klósettpappír getur verið endurunninn úr dagblöðum |
Það getur verið gaman að finna gömlum hlutum nýjan tilgang. Hægt er að vinna eitthvað nýtt úr þeim t.d. föndra úr klósettrúllum, eggjabökkum. Sauma ný föt úr gömlum o.s.frv. Einnig er hægt að fara með hlutina á nytjamarkaði eða til góðgerðarsamtaka þar sem einhver annar getur nýtt þá.
 |
 |
Gott er að hafa í huga hvort það sé hægt að endurnýta það sem við kaupum. Það er hluti af sjálfbærni en hún snýst um að gefa jörðinni jafn mikið og við fáum frá henni.
Plastpokar eru gott dæmi um hluti sem notaðir eru á flestum heimilum. Vissuð þið að þeir eyðast ekki í náttúrunni? Best er að sleppa því að nota þá en ef við eigum þá er sniðugt að endurnýta þá.
