Barn síðustu viku kom með Stefán og við fengum að lesa um helgardvöl hans hjá ER. Við sáum skemmtilegt leikfang, flettibók og svo hlustuðum við á uppáhaldstónlistina hennar. AI og KB fögnuðu 5 ára afmæli á mánudag og þriðjudag. Til hamingju krakkar og takk fyrir okkur ! Hópastarf að venju og þar var auðvitað var Lubbi, fínhreyfingar og hreyfistund í salnum. Yngri hópur teiknaði sjálfsmynd og svo lagðist ÝH á stórt blað á gólfinu. Börnin fengu að teikna útlínur hans og svo voru líkamshlutar merktir inn á myndina. Eldri hópur teiknaði líka sjálfsmynd og svo ræddum við um tennur, fjölda þeirra og umhirðu. Við bjuggum til tannbursta (sem flestir vilja fá með sér heim strax). Eldri hópurinn fór í gönguferð um kirkjugarðinn. Markmið með ferðinni var að safna mismunandi laufblöðum. Fyrst fórum við samt og kíktum á stóra, hvíta húsið í kirkjugarðinum. Við komumst að því að þetta er ekki kirkja (þó í kirkjugarði sé) heldur skrifstofa. Við heilsuðum Guðrúnu sem vinnur þar og hún spjallaði við okkur. Eftir þetta tíndum við þó nokkuð af laufblöðum og nú kúra þau í laufblaðapressunni. Barn þessarar viku er AS Hópastarf 9. október: Lubbi kom í heimsókn og unnið var með mjúka g (sbr. saga…laga) og Ff rifjað upp (2013) . Yngri hópur fræddist um Ff. Í hreyfistund var hoppað, valhoppað og boltum skoppað 😊 Báðir árgangar æfðu sig að strika og klippa eftir línu. Á meðan hlustuðum við á tónlist með afmælisbarni dagsins, John Lennon. Fréttir frá upplýsingafulltrúa Hulduheima hafa ekki borist á ákveðnum vikudegi enn sem komið er. Hins vegar er stefnt er að því að eitthvað fréttnæmt birtist á þriðjudögum. Undirritaður fréttaritari vonar að lesendur bíði í ofvæni eftir tíðindum 😊 Dóra

Síðustu tvær vikur. Það helsta: Við kláruðum að mála myndir með þekjulit. Vorum áður búin að mála svartar útlínur sem voru látnar þorna vel. Svo höfum við æft okkur að klippa og t.d. breyta ferningi í hring. Eldri hópur skreytti gluggann á Hulduheimum og yngri hópur strikaði eftir hendi, litaði og klippti. Lubbi kom í heimsókn og unnið var með Ll, Rr og Þþ. Rímið er líka alltaf á sínum stað. Tónlistarstund: Unnið með Karnival dýranna (2014) og Maxímús (2013). Við fórum í holtið og kíktum svo í Rimaskóla (spennandi nýja „leiktækið“ þar). Við fundum sem betur fer lítið af rusli í holtinu en það sem fannst var ekki gott fyrir náttúruna. Á föstudaginn (21. sept.) var „lesbíó“ í vinastund og Hulduheimabörn höfðu útbúið bíómiða sem allir Fífuborgarar þurftu svo að framvísa við inngang. Flestallir kunna nú að blanda brúnan lit og appelsínugulan. Við notuðum hópastarfstímann í þessari viku til að prófa að mála með golfkúlu og salatvindu. Þetta var hin besta skemmtun. Eldri börnin prófuðu líka að nota svamprúllu við að rúlla grunn (karton og þekjulitir). Þennan grunn munum við nota fyrir haustlistaverk. Yngri hópur fór í gönguferð í gær og heimsótti Borgarbókasafnið . Herdís Anna sagði börnunum tvær sænskar sögur - um fluguna Ögn og sokk sem fékk nýtt hlutverk. Eftir það voru bækur skoðaðar dágóða stund og svo var strætó tekinn til baka. Þegar við komum í Fífuborg tók við litaball og eftir það borðuðum við steiktan fisk. Eldri hópurinn heimsækir bókasafnið í október. „Barn vikunnar“ byrjaði í dag. Það er ER sem er fyrst til að fá Stefán dúkkustrák í helgarheimsókn. Góða skemmtun! Það er alltaf nóg að gera á Hulduheimum og í lok dags getur verið notalegt að leggjast á dýnu, hlusta á rólega tónlist og fá félaga til að dekra við sig (strjúka t.d. andlit, hendur og iljar með þurrum vatnslitapensli) 😊 Góða helgi Kveðja frá Hulduheimum, Dóra fréttaritari

Við erum smám saman að byrja hefðbundið vetrarstarf hér á Hulduheimum. Við byrjuðum í hópastarfi í síðustu viku. Þar æfum við m.a. fín- og grófhreyfingar (málörvun, borðverkefni og hreyfistund í salnum). Blær mætir til okkar á miðvikudögum eftir hádegismatinn. Við setjumst niður með hjálparbangsana og spjöllum um lífið og tilveruna, umhyggju, virðingu, hugrekki og umburðarlyndi. Við skoðum myndir og reynum að finna lausn á vandamálum sem tengjast þeim. Lubbi er líka vikulegur gestur á Hulduheimum. Af heimasíðunni: „Lubbi er íslenskur fjárhundur. Hann er duglegur að gelta og þá heyrist ,,voff – voff.” En Lubba langar mikið til að læra að tala. Þá þarf hann að læra öll íslensku málhljóðin. Hann veit að þegar hann hefur lært þau öll losnar um málbeinið og hann getur leyst frá skjóðunni. Hann hefur örugglega frá mörgu að segja.“ Á miðvikudögum erum við með listaskálann og í síðustu viku vorum við t.d. að æfa okkur að nota pensla: Mála mynd, þerra pensilinn, skipta um lit og hreinsa að lokum. Sumir eru búnir eða byrjaðir að sauma í myndirnar (stingum göt með skrúfjárni 😊). Í síðustu viku fór allur hópurinn í stutta gönguferð. Börnin kusu um leikvöll eða holtið. Við skruppum á leiksvæðið í Berjarima og héldum svo þaðan út í Rimaskóla. Það er alltaf fjör að hitta systkini og gamla Fífuborgara. Fyrsta vinastundin var á föstudaginn. RÓ fagnaði fimm ára afmæli í dag. Til hamingju !! Við á Hulduheimum stefnum að því að skila inn sögu í smásagnasamkeppni KÍ. Skilafrestur er 20. september. Við erum byrjuð að setja söguna saman með því að nota orð og hugmyndir sem fundust við „þankahríð“ . Þetta er dularfull saga sem gerist í leikskóla. Kveðja, Dóra fréttaritari

 Nú eru tvö börn á Hulduheimum búin að eiga sex ára afmæli. Það eru þau ÓA og UR. Til hamingju krakkar !

Báta/skipaþemað hélt áfram í þessari viku. Florian bauð börnunum í listaskála og þar voru framleiddir og „sjósettir“ flekar í stórum stíl (í gær). Svo var bréfbátagerð hjá Christian í síðustu viku.

20. júní. Loksins var sólardagur þegar við drifum okkur í Sjóminjasafnið/Varðskipið Óðin við Grandagarð. Fyrst fengum við okkur epli á bryggjunni og lékum við eineygðan hund sem heitir Snati. Við fengum leiðsögn um nýja sýningu sem heitir " Fiskur & fólk - sjósókn í 150 ár " og þaðan héldum við svo út í varðskipið. Við fengum okkur nesti sem Magda var búin að smyrja handa okkur og töltum svo af stað í strætó, með viðkomu á vinnustað foreldra GM 😊

26. júní. Gufunesbær heimsóttur í annað sinn á tæpri viku. Nú var sko grillað. Sæunn og Helga komu akandi með veisluföngin en við fórum gangandi- að sjálfsögðu. Börnin skemmtu sér vel og við vorum c.a. þrjár klst á staðnum. Þarna voru líka elstu börnin úr leikskólanum Laugasól. Þegar lagt var af stað til baka voru nokkrir orðnir fótafúnir og þyrstir. Eftir kaffitímann var svo Christian með nuddtíma. Nuddið snerist um að líkja eftir bátum sem sigla fram og til baka (á bakinu). Svo fer að rigna og það koma eldingar. Allt verður rólegt að lokum 😊 Ekki slæmur endir á góðum degi…

P.S. Tvær tennur losnuðu af náttúrulegum orsökum í dag 😊